عاجل

6 يوليو، 2012

قصيده عـفـية شعـب ( جمعة الثورات العربية )

للشاعر العراقي – عارف مأمـون

alt

عَـفْـيَـة شَـعَــبْ
عفية شعب بيه العجايب مو عجب
جمعة ندم
جمعة غضب
أنواع عدنه من الجمع
كل وحده عنوان وخطب
جمعة صمت
جمعة شغـب
جمعة حواسم بالبلد
جمعة سلب

عـفـية شعــب
مرة لطم … مرة لعب


مرة يصفك للصنم
مرة يشجع المنتخب
 عـفـية شعــب
نايم على أبيار النفط
وليهسه يطبخ بالحطب
alt
عـفـية شعــب
مثل الجمل عاگول ياكل للأسف
وشايل على ظهره ذهب
عـفـية شعـب
حتى بوكت بيده الأمر
تيّه احسابه وما حسب
وحتى البعض من أمّنه
ونطاه صوته وصعَّده
alt
بس يوصل الكرسي گلب
نهرين عنده وما زرع
والغربة بيه زرعت رعب
عبوات . ..والغام … وحزم
ما قصروا أهلي العرب
دم ومآتم حمّلت
وصار الحصاد من الركَب
يابو لهب …
دزِّنه من عــدكم حطب
وارتاح لتشيل الحمل
حماله عدنه اعله الطلب
بس يا شعــب …
معذور من صابك تعب
ثلاثين مرَّن بالألم …
بالجوع مرة … وبالحرب
جيش القدس … جيش الفرس
جيش السما … جيش الأرض

وجيوش أنواع ورتب
بس يا شعب لا تستلب
فك عينك وشوف الدرب
ميّز العدو … من المحب
ميّز الصدك … من الجذب
ركِّز عدل … من تنتخب
الشغلة لازم تنحسب
alt
هذا عدل … لو مو عدل ؟
أصل وفصل … لو بس شكل ؟
من الكتل … من النخب ؟
بس للوطن … لو للحزب ؟
ميهمك شلابس بعد . ..
قاط أجنبي … صاية وعكَل
عمامة وبشت
المهم شايلَّه عقل
والمهم ميبيع البخت
والمهم … والكَلش أهم
صادق يحافظ على الشعب
[ عدد التعليقات : 0 ] [ 1٬954 مشاهدة مشاهدة ] [ مصطلحات ذات صلة: ] [ التصنيف : ساحة الأدب والخواطر ]

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

اخر الاخبار

العقار والخدمات العامة



المشاركات والتعليقات المنشورة بأسماء أصحابها أو بأسماء مستعارة لا تمثل الرأي الرسمي للصحيفة بل تمثل وجهة نظر كاتبها

جميع الحقوق محفوظة لـ صحيفة البيرق 2014

المهاد الذكية

المهاد الذكية